TRAJNIM PËR QASJE NË INFORMACIONE ME KARAKTER PUBLIKI: “STANDARDE EVROPIANE DHE ZBATIMI KOMBËTAR”
Agjencia për Mbrojtjen e të Drejtës për Qasje të Lirë në Informacione me Karakter Publik, në bashkëpunim me Zyrën e Programeve të Këshillit të Evropës, mbajti një trajnim me temë: “Qasja në Informacione me Karakter Publik: Standardet Evropiane dhe Zbatimi Kombëtar”. Në këtë mënyrë, Agjencia shënon 28 shtatorin – Ditën Ndërkombëtare për Qasje Universale në Informacion.
Eventi u zbatua në kuadër të projektit “Mbrojtja e Lirisë së Shprehjes dhe Lirisë së Medias në Maqedoninë e Veriut (PRO-FREX)”, i cili është pjesë e programit të përbashkët të Bashkimit Evropian dhe Këshillit të Evropës “Instrumenti Horizontal për Ballkanin Perëndimor dhe Turqinë 2023-2026”.
Plamenka Bojçeva, Drejtoreshë e Agjencisë për Mbrojtjen e të Drejtës për Qasje të Lirë në Informacione me Karakter Publik, dhe Oleg Soldatov, Drejtor i Zyrës së Programit të Këshillit të Evropës në Shkup, mbajtën fjalimet e tyre përshëndetëse.
Trajnimi ishte i destinuar për zyrtarë nga ministritë dhe Qeveria e Republikës së Maqedonisë së Veriut, me qëllim forcimin e njohurive të tyre mbi kuadrin ligjor ndërkombëtar dhe legjislacionin vendas që rregullon të drejtën për qasje në informacion. Përmes një programi dinamik dhe interaktiv, pjesëmarrësit patën mundësinë të thellonin njohuritë e tyre mbi standardet evropiane për qasje në informacion, duke përfshirë Konventën e Tromsø-t, Konventën e Aarhus-it dhe Nenin 10 të Konventës Evropiane për të Drejtat e Njeriut, si dhe jurisprudencën përkatëse të Gjykatës Evropiane për të Drejtat e Njeriut.
Fokus i veçantë iu kushtua temave të tilla si: zbatimi i kuadrit ligjor vendas në kontekstin e standardeve ndërkombëtare, kufizimet e së drejtës për akses në informacion dhe testi i interesit publik, trajtimi i abuzimeve të së drejtës për informacion dhe roli i institucioneve mbikëqyrëse. Trajnimi u drejtua nga ekspertët German Filkov dhe Tetiana Oleksiuk, konsulentë të Këshillit të Evropës.
Trajnimi kontribuoi në promovimin e transparencës, llogaridhënies dhe qeverisjes së mirë në Maqedoninë e Veriut, duke inkurajuar zbatimin më efektiv të së drejtës për akses në informacion dhe bashkëpunimin e zgjeruar midis institucioneve, medias dhe shoqërisë civile.
Ndërkohë, Agjencia i bashkohet iniciativës së Konferencës Ndërkombëtare të Komisionerëve të Informacionit (ICIC) për të shënuar Ditën Ndërkombëtare për Qasje Universale në Informacion, për të promovuar të drejtën për akses në informacion, si dhe për të ndarë njohuritë duke rritur ndërgjegjësimin global për temën e këtij viti: “Sigurimi i Qasjes në Informacionin Mjedisor në Epokën Dixhitale”. Agjencia ka përgatitur një analizë të temës dhe ajo do të ndahet në Buletinin Special 2025 të ICIC.
Analizën mund ta gjeni në linkun që vijon:
