АГЕНЦИЈАТА ЗАПОЧНУВА МОНИТОРИНГ НА ВЕБ-СТРАНИЦИТЕ НА ЈАВНИТЕ ПРЕТПРИЈАТИЈА ВО НАДЛЕЖНОСТ НА ОПШТИНИТЕ И ВЛАДАТА НА РСМ
Во насока на зголемување на транспарентноста и отчетноста, Агенцијата за заштита на правото на слободен пристап до информациите од јавен карактер започнува со спроведување на мониторинг на веб-страниците на јавните претпријатија во надлежност општините и Владата на ВРСМ. Мониторингот ќе опфати вкупно 43 иматели на информации, од кои 31 јавно претпријатие кои се во општинска надлежност, а 12 претпријатија се во надлежност на Владата на ВРСМ.
Проценката на нивото на транспарентност ќе се врши преку детално подготвен прашалник кој содржи 36 прашања и потпрашања. Овие критериуми произлегуваат од членот 10 од Законот за слободен пристап до информации од јавен карактер (СПИЈК) и ќе овозможат објективна евалуација на достапноста на информациите за граѓаните, објавени на нивните веб страници. Мониторингот ќе започне на 27 март и ќе трае заклучно со 27 април, а службените лица кај мониторираните иматели до 9 април 2025 година ќе треба да одговорат на доставениот Прашалник, односно да направат самоевалуација на своите веб страници. Агенцијата, согласно Методологија за спроведување на мониторинг за проактивно објавување на информации од јавен карактер, ќе изврши мониторинг на веб страните и истите ќе бидат оценети согласно информациите кои се објавени/поместени на страниците во мониторираниот период.
Проактивната транспарентност претставува клучен принцип во обезбедувањето на слободен пристап до информациите од јавен карактер. Јавните претпријатија имаат обврска редовно и навремено да објавуваат информации на своите веб-страници, со што им се овозможува на граѓаните побрзо и поефикасно да се запознаат со нивната работа, но и со преземените активности кои произлегуваат од нивните надлежности. Ова е особено важно за унапредување на демократските процеси и зајакнување на довербата во институциите.
Мониторингот има за цел да идентификува потенцијални недостатоци во објавувањето на информации и да предложи подобрувања, со цел граѓаните да добијат полесен пристап до податоците од јавен интерес. Очекувано е резултатите да дадат јасна слика за усогласеноста на јавните претпријатија со законските обврски за транспарентност.
Извештајот со наодите од мониторингот ќе биде објавени на веб страницата на Агенцијата по завршувањето на анализата и истиот ќе биде достапен за имателите на информации, но и за јавноста.
